كاينو البارح برك كنت معاك..ليل كامل ما رقدتش نخمم فيك توحشت صوتك.
قمت هزيت التليفون طلبت نومروك و بكيت أمي.. بكيت خاطر نعرفك مكش بش تهز عليا.
قداش من مرة قنعت روحي إلي
إنتي مشيت و إلّي الحكاية وفات .. قداش من مرة قلت للروحي الحياة تستمر و النسيان
نعمة.. قداش من مرة جيتني في المنام توشوشلي و ما نفهمكش.. قداش من مرة تكلمني و
ما نسمعكش.. تضحكلي و تمشي و أنا نبقى نستنى فيك بش ترجع و إنتي ما ترجعش.
أمي.. توحشت نجري نتخبى وراء ظهرك.. نشم شعرك و مبعد نفرفشهولك.. توحشت
قبقابك و سفساريك.. توحشت شقّاقتي وماكينة الخياطة و حوايج العيد. ياخي ما
توحشتنيش؟
مازلت فيّا أمي.. تعيش في داخلي..ساعات نسمع صوتك في مخي.. و ساعات
نجبد تصاورك بش نبقى ديمة نتفكر وجهك.
تعرف قداش عمري اليوم؟ إنتي راضية عليا؟ أمي .. تسمع فيا؟
في بالك عمري ما قتلك نحبك؟ ممكن وقتها ماجاش البالي إلي إنتي تنجم
تمشي و تخليني.
فهمني أمي.. راني ضعت.. رسيني و قلي شنعمل..قلبي معبّي حزين و الدنيا
صعابت..الناس تبدلت.. البلاد تبدلت.. العالم تبدل.. حتى أنا أمي.. حتّى أنا تبدّلت.
قلي شنعمل.. شنوا نجم نعمل بش ترجع.. تعرف كان ترجع الدنيا تزها في
وجهي و ما عادش نبكي أمي.. موش إنتي ما تحملش تشوفني نبكي؟.. كان ترجع أمي نعنقك و
نبوس كفوف يدك و نبكي عند ساقيك بش تسامحني.. كان ترجع أمي نرجعو كيما قبل.. نتلمو
عندك كل نهارة جمعة نفطرو كسكسي و نفدلكو و نعملو جو... كان ترجع أمي ما نحطك فوق
ظهري و نجري بيك نخبيك بش ما عادش تسيبني.
أمي.. مصعب فراقك.. راني تعبت.. تعبت من مشاكل الدنيا..تعبت من روتين
كل يوم.. تعبت م الخدمة.. تعبت م الأحلام.. تعبت م الناس الدايرة بيا.. وحدك أمي
تحس بيا .. وحدك أمي تعرف دوايا..
أمي.. هزني.. إيجا هزني بين إيديك و طير بيا بعيد... بعيد.. بعيد..
غادي وين إنتي تكون.. مادمني في حضنك أكيد بش نكون في راحة.
Miramar _
ميرامار
