الحرب قادمة فأغتسلوا

أكيد أنكم تذكرون أو ربما البعض منكم بعضا من مداخلاتي التي إعتبرتموها غريبة ومضحكة في وقت ما ثم أصبحت يقينا اليوم كحقيقة ثورة تونس وربيع الثورات العربي كذلك قصة تحرر ليبيا ومصر وما يحصل اليوم في سوريا. هذا ما جعلني اليوم أسبق كالعادة لكتابة هذا المقال وقدإخترت على غير العادة  أن أكتب باللغة العربية ليتمكن أصدقائي المنتمون إلى بلدان عربية مختلفة من قراءته وفهم فحواه، هذا المقال الذل سأعتبره من أهم بل أهم ما سأكتبه ليكون

بذاك شاهدا على عصري وموثقا لما سيحصل في العشر سنين القادمة. 

فل نستفتح بمقولة جميلة أسلوبا مخادعة مضمونا رأيتها في أحد الجرائد الأمريكية تقول " أنا ولدت في تونس، كبرت في مصر وترعرعت في ليبيا وها أنا اليوم أجاهد في سوريا..  أنا الحرية فأتركوني أتركوني يا أعداء الإنسانية" .   هذه المقولة التي أبدأ بها المقال تجعلني بالضرورة أنطلق من بلدي تونس التي سبق وأن كتبت عنها مقالا تجدونه في هذا الرابط:  http://miraamar.blogspot.com/2012/04/14-2011.html

وملخص ذلك المقال أن ما حصل في ليلة 14 جانفي 2011 كان إنقلابا لعبت الصدفة ضده مع تأطير إعلامي ممنهج ونتحدث هنا على قناة الجزيرة فتحول إلى ثورة شعبية تنادي بالحرية وبقية المبادئ الجميلة التي تعرفونها. وتزامنا مع مجموعة من الإحتجاجات في مصر بعد أن صور لهم نفس ذلك الإعلام الممنهج أن ما حصل بتونس هو ممكن أيضا في بلدهم، إشتعلت نار الفتنة وأصبحت مصر هي الهدف الثاني لمشروع كنا قد سمعنا عنه سنة 2005 بعد فشل حرب الولايات الأمريكية على العراق وسنأتي بذكر تفصيل لذلك فيما بعد. فنعود لمصر حيث إتفقت سلطتهم على تسليم الحكم سلميا مقابل توفير الحماية لهم وذلك ما حصل فعلا فحسني مبارك سلم السلطة للمجلس العسكري مقابل مجموعة من الضمانات تجعله وأولاده ينعمون بعيش كريم بعد الإتفاق على تمثلية لا تدوم كثيرا كمهزلة محاكمته ومرضه وبقائه بالمستشفى الخاص وسجن أبنائه.

قيام ضابطين بتأدية التحية العسكرية لجمال مبارك

وبعد نجاح المهمة بكل من تونس ومصر إتجهت الأطماع إلى ليبيا ولكن قبل ذلك تطلب من الولايات المتحدة الأمريكية طي صفحة "الإرهاب" وتلك التهديدات المزعومة ليأتي لاحقا نبأ غارة على الباكستان تم القضاء من خلالها على كذبة بن لادن و رمي جثته بالبحر.

الجزيرة دائما في الموعد لخدمة الأجندات الأمريكية الإسرائلية

 

ونعود بذلك لليبيا إذ تمت صفقة بيع وشراء بين الجهاز الأمريكي الملتحي المتأسلم (القاعدة) والنظام الأمريكي الصهيوني فكان الإتفاق يتلخص في تصفية القذافي وعائلته، حصول الإخوان الليبية على الحكم مقابل النفط .والرعاية الأمريكية وخدمة مصالح إسرائيل

إفتتاح سفارة اسرائيل في ليبيا

عود الآن إلى المخطط الذي كنا قد ذكرناه سابقا وسط المقال ومن خلاله ستتوضح لكم أكثر صورة ما كتب سابقا وما سمعتموه من الناس وبعض الصفحات المحترمة.. لذلك ادعوكم  الآن إلى سنة 1999 والذي له علاقة وطيدة بما يحصل بسوريا اليوم.

أنتم تعلمون أن الولايات المتحدة الأمريكية هي من الدول التي تقوم بصناعة الأزمات لتحلها فيما بعد لتظهر في شكل البطل أمام المواطنين الأمريكيين. وفي هذا الإطار جاءت فكرة  خلق ما يسمى "الإرهاب"  إذ أن هذا اللفظ لم يكن متداولا إلا بعد سنة 2001. حيث قامت الولايات الأمريكية بخلق مجموعة من المسلحين يهددون أمن أمريكا وبقية بلدان العالم تحت راية دينية .. وألبسواهذه المجموعة حلة اللحية والإسلام لتتماشى وثقافة ووضع البلدان المراد غزوها.

أوضح الكلام أكثر ، أمريكا دولة تدافع عن الحريات والديمقرطيات والإنسانية فلا يمكن لدولة بمثل هذا الإنضباط أن تهجم على دول بعيدة عنها آلاف الكيلومترات طمعا في نفطها وثروات أرضها.. فوجب إيجاد تعلة وعدو وهدف وذلك ما حصل فعلا: إذ قامت أمريكا بخلق أزمة الإرهاب التي تهدد أمنها وامن البلدان المجاورة ونتحدث هنا عن أحداث 11 سبتمبر 2001 وجعلت لهذه الظاهرة آلة مسؤولة تتمثل في "القاعدة" وجعلت لهذه الآلة شكلا وحلة وهدفا وهو محاربة كل بلد غير مسلم تحت راية الجهاد في سبيل الله. 

صورتان نادرتان تكشفان التاريخ الحقيقي لأسامة بن لادن : هكذا ولد من نطفة بريجنسكي وبويضة وكالة المخابرات المركزية

إلا أن ما حدث ميدانيا كفشل حرب العراق ومحاولة الدخول إلى لبنان جعل من الولايات المتحدة تبدأ جديا إعادة التفكير في مخطط جديد يمهد لها الحصول على مبتغاها. وهذا ما تحدث عنه أحد المحللين السياسيين توني كارتالوتشي وهو ما سماه المخطط الجديد للشرق الأوسط والذي يتمثل في طي صفحة الإرهاب وبن لادن والحرب ضد الإسلام وجعلهم حلفاء يخدمون مصالح أمريكا وإسرائيل من خلال تواجدهم بالسلطة.

وليكون المخطط عمليا أكثر قامت امريكا بإختيار بلد يكون خادما مخلصا لها ووسيطا ينتمي لثقافة البلدان المراد السيطرة عليها قريبا منهم ومجاورا لهم فشاءت الأقدار أن تكون قطر صاحبة الحظ إثر توقيع مجموعة من الإتفاقيات التي لا تخلوا من تنازلات أخجل حرجا من ذكرها.

قطر تعلن مد إسرائيل بالغاز بدلا من مصر

ونعود بذلك إلى ما يحدث بسوريا اليوم الذي هو لا يمثل إلا متابعة لما خطط له منذ 12 سنة ..ما يحصل بسوريا لا يمد للثورة بصلة ولعل إصرار الولايات المتحدة الأمريكية التدخل عسكريا أقوى دليل على مدى إنعدام النزاهة وخطورة الوضع بالشرق اليوم.. فهدف أمريكا في النهاية ليس إلا جعل سوريا بوابة للدخول لإيران والقضاء عليها.. لا أريد أن أقول انها حرب أديان وطوائف لكنها فعلا كذلك فمصلحة الإخوان اليوم القضاء على الشيعة من الناحية الدينية والسياسية ومن مصلحة أمريكا وإسرائيل القضاء على إيران وحزب الله لما يمثلونه من خطر يهدد عسكريا  السيطرة وتكنولوجيا وحتى ثقافيا أمن ومخطط إحتلال العالم. 

في النهاية أريد أن أقول إنك فعلا يا حرب ولدتي بتونس وكبرتي في مصر وترعرعتي في ليبيا ولكنك بإذن الله ستقبرين بسوريا وإلا فأغتسلوا إن الحرب قادمة!

ميرامار_Miramar

مؤامرة الشرف على قناة الضلف (قناة التونسية تحت المجهر)

الأكيد أنكم عرفتو من خلال قناة التونسية أنو صبيحة 31 جويلية 2012 تم زيارة القناة وشركة كاكتوس من قبل السادة الأفاضل المحترمين المبجلين رجال تونس جملة "فرقة أبحاث الديوانة" الذين هبطو كي العقاب  للقيام بالعمل متاحم بحثا عن أي تجاوزات قانونية أو خروج عن العدالة والقانون على مستوى المعاملات الإدارية لهذه الشركة. طبعا الأساتذة الأفاضل أبحاث الديوانة مكانش معاهم تصريح من الجهات المعنية للقيام بهذه المهمة وهذا يدل على أن البوليس متاعنا ما يستحقش ورقة أو إذن بش يبدع في العمل متاعو.. الناس تطبق في القانون عندها "تعليمات" بش تبحث وكانت لقات حاجة تو يجي التصريح، علاش نقلقو المسؤولين مصاريف وطابع و تصحاحة و كمبيوتر بش يتكتب التصريح و ضو وخدام بش يكتبلك وقربلا مبعد ما يطلع فما شي؟ هذي إسمها تدابير إحترازية والعقلية في تونس مازالت ماتفهمش هالنوع من الممارسات. الحاصيلو في الإخر وللأسف طلعت القناة أمورها مريقلة ومنظمة وكل شئ قانوني ولذلك نحب نقول للأبحاث وكيما قال عبد الحليم حافظ "لا تحزن يا ولدي" من إجتهد وأصاب له أجران ومن إجتهد ولم يصب له أجر واحد. وقبل ما ننتقل لبقية الأرتيكل نحب بلحق من كل قلبي نشكر الأمن والداخلية بالرسمي لسهرهم على محاربة الرذيلة والإجرام والله بلحق تأثرت الدموع تنهمر خاصة وأني وأنا نكتب توا قاعدة نسمع في غناية "بالأمن والأمان يحيا هنا الإنسان".

طبعا تعرفو الناس الكل إلي القنوات الخاصة في تونس ولا حتى في العالم راس مالها الأساسي الومضات الإشهارية بما أنها ما تاخوا حتى دعم م الدولة كما هو الحال في الوطنية مثلا..و حكاية كيما إلي صارت إل كاكتوس تنجم تسبب بهروب المستشهرين وبالتالي إفلاس القناة وإغلاقها. ولربما زادا في نفس الوقت أبحاث الديوانة كانو يخدمو في خدمتهم، لكن فما برشة أسئلة دارت في راسي كيما دارت في روس برشة عباد كمثلا علاش قناة التونسية بالذات؟ علاش نهارة 31 بالذات؟ ياخي ماتفكرو كان نهارتها السهر على تطبيق القانون؟ لذلك بديت نحلل ونفكر و توصلت لتلاثة فرضيات موش بش تخرج الأسباب من وحدة فيهم.

الحقيقة الفرضية الأولى هي أول حاجة تخطر في بال التونسي، أنو القناة هذي تحقق في نجاح باهر وثابت وحسب إحصائيات شركة "سيقما" لسبر الأراء حققت التونسية أعلى نسبة مشاهدة في رمضان وصلت ل 85°/° أثناء مشاهدة مسلسل مكتوب. وكيما قلنا في البداية راس مال القنوات الخاصة هو الإشهار وأن تكون القناة ناجحة وتونس الكل تتفرج فيها هذا يعني أمطار من الإشهارات وهذي حاجة باهية للقناة. تبيقنا  التونسية ماهيش القناة الخاصة الوحيدة في تونس بل هي وحدة من 7 تلافز اليوم مصدر رزقهم هو الإشهار يتانفسو عليه، ومعطيات كيما إلي عطاتها شركة سيقما تسكر اللعب على هالقنوات هذي وتخلق نوع من الحسد والبغض والغيرة تخلي صاحبها ينجم يعمل أي حاجة خوفا على ذهاب الرزق إلى أفواه منافسيه، وهكاكة نجمو نرجعو للحكايتنا فنقولو أنو لربما إلي صار للتونسية كان صابوتاج من أحد القنوات الخاصة المنافسة عندها شوية نفوذ وحبت من خلالها تقطع خبزة الناس وهذا جائز...جائز ولا؟

ندخلو ديراكت في الفرضية الثانية وخلي نبداو من مسلسل مكتوب.. للي يتبع فيه و معلومة زادة للي ما يتبعش فيه الحكاية في المسلسل السنة جابت شخصية جديدة إسمها "يوسف بالشيخ" الشخصية هذي تورينا رجل أعمال غني برشة نقولو أحنا في لغة البيزنس حوت كبير في البلاد وعندو نفوذ قوي برشة توصل لدرجة أنو يقدر يخرج شخص محكوم عليه بالسجن لجريمة قتل فالبلاد بلغة أخرى تمشي على قرنو.. طبعا التوانسة الكل ومن غير ما تقوللهم فهمو أنو الشخصية هذي هي تجسيد لبلحسن الطرابلسي أخ ليلى بن علي حتى أنو فما أحداث في المسلسل صارت فعلا وصدرت حقا عن بلحسن كي كان يعبر في تونس. بالطبيعة حكاية كيما هذي تنجم تكون أزعجت بلحسن وبعض الناس الي مزالو في تونس كانو في السابق كلاب هؤلاء الطرابلسية  الأوفياء وأحداث المسلسل تقصدهم شخصيا ولربما عندهم زادا بعض النفوذ فحبو يقرصو سامي الفهري شخصيا من خلال قناتو وشركة كاكتوس ويعمللو صابوتاج مزيان كيما إلي صارلو بش يتربى وماعادش يعاود صنعتو، وهذا جائز... جائز ولا؟

أخيرا ويقولو ختامها مسك الفرضية الثالثة وإلي أعتبرها أضعف الفرضيات ونرجعو للبرمجة الرمضانية والمرة هذي مع برنامج التمساح إلي كانو ضيوفو فنانين وسياسيين زادة وموش أي سياسيين وإنما ناس في مواقع حساسة في الحكومة وغيرو.. طبعا البرنامج قائم على تفدليكة مع الضيوف إلي يلقاو رواحم محصورين في مصعد متبلوكي قدامهم تمساح ينجم يهجم عليهم في أي لحظة.. لحقيقة موش الناس الكل تحب التفدليك خاصة كي يتفرج فيك 10 ملايين تونسي وإنتي المفروض مكبوس وهيبة وهيلمان وفي الأخر تتشاف تصيح كي المرأة مرعوب وتونس الكل تضحك عليك و تعملك تكركيرة مبعد في السهرية على صفحات الإنترنات. الفازا هذي تولد شعور بالنقمة والإنتقام خاصة مع الناس إلي ما تحملش التفدليك وتاخذو بجدية زيادة عل اللزوم وتتعامل معاه على أساس مشكلة شخصية فمنستغربش أنو يكون واحد من السياسيين هاذم بعث مجموعة من الأمن ككبسة للقناة ورد الإعتبار على الأقل من الناحية النفسية، وهذا جائز.. جائز ولا؟

طبعا هذا كان تحليلي الشخصي والأكيد برشة منكم يتساءل توا أش حرق شعيرها هي تقفف لسامي و كاتبة مقال وتحلل؟ شمدخلها؟.. والحقيقة أنو الإجابة ساهلة ياسر..أولا صحيح أنا كتبت المقال هذا من جانب القفة لسامي الفهري خاصة وأنو سمعت إلي هو يخَلِص مليح قلت برا نكتب كلمتين حلويين على شوية تبندير بالك نسلكها في كونترا جديد.. ثانيا موضوع التونسية يهمني لأني كنت أتعامل معها نسبيا وبصراحة نغير عليها ومن واجبي أني نكتب على حاجة كيما هكا إلي ما يلزمهاش تتعدا مرور الكرام، أخيرا القناة هذي ما نتفرج كان فيها في الغربة وهي الوحيدة الرابط بيني وبين تونس كي نبدا ماعنديش كونكسيون وإغلاقها بش يسببلي ولبرشة كيفي حزن نسبي لعدم كفاءة القنوات الأخرى في توفير جو يخلي التوانسة إلي بالخارج يكونو ميز آ جور مع إلي صير في بلادهم وولاد بلادهم في غيلب الإنترنات.

بربي قبل ما نخليكم فما حاجة ماقلتهاش وهي أني نتفكر أيامات "الثورة" سامي الفهري تلقى هجوم كبير من برشة مدونين موجودين اليوم يبرتاجيو ساعات فيديوهات التونسية وبعضهم تم إستدعائهم في برنامج لباس..البارح كانو يصفونه بالسارق وبالمتواطئ وطالبو بمحاسبته واليوم يدافعون عنه والبروفيلات مازالت موجودة بربي نحب نقلهم أمان يزيو راكم عملتو العار النفاق قريب بش ينطق.

                                                                                     ميرامار_miramar 

بروتوكولات صهيون: الكتاب الأسود ومخطط الثعبان

الحكاية بدات من عشرة سنين تقريبا، كان عندي خال أمي الله يرحمو راجل كبير، عرفت من مماتي والوالدة أنو سافر برشة وأنو حارب الاستعمار وكان من المطلوبين الفارين من النظام الفرنسي إلي حكم عليه بالإعدام شنقا في بداية الأربعينات، ما أضطرو أنو يغادر الوطن في اتجاه الشرق ليشارك فيما بعد في حرب فلسطين عند قيام الدولة الإسرائيلية ولبنان بعدها.. خالي هذا سافر لليونان والهند واليابان ومصر وبلدان آسيوية عديدة وكانو في عايلتنا يعيطولو ابن بطوطة لكثرة مغامراتو. وفي بداية الثمانينات حاربت مماتي إلي هي تجي أختو بكل جهدها بش ترجعو لتونس بعد إسقاط تهمة الإعدام ومشاكل أخرى كي وصّلت حكايتو لبورقيبة إلي صرحلو بش يدخل ويرجع لبلادو بعد أكثر من أربعين سنة غربة.

إستقر خالي بعدها في دار مماتي في باب سويقة ونتذكر كي كنت صغيرة كنت نخاف منو ..كان قليل الكلام ويتفرج ياسر في الأخبار ويبعثني ديما نشريلو دخان لونو روز نسيت إسمو أما نتذكرو رخيص برشة، وكان كلامو فيه ألفاظ شرقية شوية كيما "زيْ" و "بكرة" و"ترويقة". المهم، خالي هذا كانت عندو مكتبة غريبة وعجيبة والكتب متاعو الكل قديمة ، قديمة برشة.. أما كان من المستحيل بل من سابع المستحيلات أنك توصللها دايور شطرها كان مخبي في السدة وخالي تقريبا كان نادر الخروج يعني بالعربي من غير ما تحاول تفكر تهز كتاب أو حتى تتصفح لأنو هذا ممنوع منعا باتا.

كان عمري وقتها ثلاتاش سنة يومها كان عيد.. جينا نعيدو على مماتي وبالطبيعة بش نعيدو على خالي، تلمت الناس الكل في الصالة وفي وصت القعدة طلب مني خالي نجيبلو باكو دخان كي العادة ونمد الفلوس من بيتو..أيا كي الصغار الباهين دخلت للبيت شربت شريبة ماء وأنا نترشف كبتيت كتاب قديم كبير ياسر مكتوب عليه الأبراج والفلك وتفكرت أمي مرة حكاتلي قتلي شافت كتاب عند خالي قرات منو شوية متاع أبراج وطيارة موش نورمال فربطت الخيوط وقلت هذا هو وبدات الأفكار الشريرة تجيني بش نقطع بالكتاب ونقراه ونشوف حظي آش يقول وآش مخبيلي المستقبل.

هبلت، دودة تاكل فيا ،يلزمني نهز الكتاب نقراه ونرجعو في بلاصطو من غير ما مماتي تفيق بيا و ماغير ما خالي يعرف..أيا بديت نخطط و نكمبس وحطيت خطة،  قمرت بلاصة الكتاب والخطة أنو عملية الغورة تحصل في المغرب.. غفلت مماتي تصلي، دخلت نلقى خالي متكي وكأنه راقد، تسرسبت في الظلمة كي السارق، وأنا نرعش لا يفيق وجبدت الكتاب وحدة وحدة، حطيتو تحت مريولي وحصرتو مع السروال وقبل ما نخرج شعلت الضوء فقام خالي قتلو "قتلك ميمة راهو المغرب أذّن والأخبارعدك بها بدات وشعل الضوء موش باهي مغرب تبقى في الظلمة." وجريت كي الصاروخ دخلت للتواليت، خذيت نفس وأنا قلبي يضرب في 700 وجبدت أكا الكتاب العزيز الغالي. كانت صدمة حياتي، كتاب روز تقول مصبوب عليه جفال وبقى منو بقايا اللون الوردي كي لون لحم الخنزير بالضبط وريحتو تعطعط بالندوة، أوراقو صفر غامقين وكتاب تاعب تاعب لأقصى درجة تقول بش يتفتفت توا، مكتوب عليه بالأكحل "بروتوكولات صهيون" بخط كبير خشين وتحتها أما خط أرفع "الكتاب الأسود ومخطط الثعبان". أيا لبْني العرق م التنرفيز وركبني العصب قريب بش نتصكك..شنوة هالكتاب الماسط أنا نحب على الأبراج..أيا قررت نحط خطة فيسع في التواليت نرجّع الكتاب هذا عل الأقل بش مايفيقوش بيا وناكل طريحة من غير فايدة ومبعد تو نرجع نهز كتابي في فرصة أخرى.

خرجت م التواليت والكتاب تحت مريولي نلقى أمي وبابا جاو بش يروحو بيا توا توا خاطر خلاو خواتي وحدهم..شوف الزهر المزمر..حبيت نغفلهم و نلقى حل.. شيء موضوع الترجيع صعيب شوية بل مهمة مستحيلة. أيا روحت لدارنا.. بون، قلت تو نشوف كيفاش  نرجعو سينون لا ريت لا شفت لا مسيت وطيشت أكا الكتاب في بيرويا مع بقية المهملات من الكتب. صدقوني بعدها بأربع أسابيع تقريبا طاح خالي م الدروج على راسو وتوفاه الله ربي يرحمو.. وعرفت فيما بعد أنو خالي الصغير حرق المكتبة الكل وما خل فيها شيء إلا كتاب ولاّ ثنين من الكتب الدينية النادرة جدا لطبعتها القديمة.

وتعدات عل الحكاية عام ونص، نهير كيما هاليوم، أول نهار في رمضان..صايمة وقالقة وما عندي ما نعمل قلت نجبد كتاب نقراه نعدي بيه الوقت، وأنا نفركس على حاجة ما قريتهاش جا في يدي كتاب خالي.. قعدت نغزرلو، قلبتو منا ومنا قلت أيا أنا ما عندي مانعمل خنعمل عليه طلة. أيا إتكيت عل الفرش تصفحتو فيسع فيسع ورجعت للغلاف نثبت فيه ففهمت أنو أصل الكتاب أحمر وموش روز كيما هو توا وإنما القدم خلا اللون يبهت ما خلاني نفركس على التاريخ إلي تطبع فيه الكتاب نلقى في أول صفحة حسب ما نتذكر أنو تصدر في أول الأربعينات أما ما نتفكرش وقتاش بالضبط 40،41 حاجة كيما هكة و ريت أنو دار النشر لبنانية. كتاب بسيط جدا وبصراحة شكلو مايشجعش بش تقراه خاصة أنو ريحة الندى قلقتني برشة. المهم، حليت الصفحة الأولى مافهمت شئ الثانية مافهمت شئ، عديت ستة ولا سبعة وراق وقريت ومافهمت شئ حطيت الصفحة الأخيرة وبالطبيعة ما فهمت شئ. رجعت نتصفح في الكتاب كبتيت تصويرة على طول الكتاب.. رجعتلها، كانت خريطة في وسطها ثعبان كبير ملولب بطريقة تخليك تفهم أنو إنطلق من نقطة وتعدا بمسار لين وصل لنقطة أخرى. أول ما فركست جات عيني على تونس ومبعد لاحظت أنو الخريطة هذي لا فيها أروبا ولا أمريكيا ولا روسيا..جوست البلاد العربية الإسلامية أكهو. الحقيقة رجعت نقرا في الكتاب بش نفهم المعنى متاع هالمخطوطة وبديت نقرا.

أول الكتاب كان يحكي على الحلم اليهودي بإنشاء دولة وأنو في ذلك راحة لنفوس كل اليهود أنو يكون عندهم تراب يجمعهم يعيشون عليه ويدفنون فيه.. ثم بدا يحكي على "أرض الميعاد" ويفسر معنى كلمة أرض الميعاد وكيفية الوصول إليها..انو هذه الأرض ملك لليهود من قديم الأزل وأفتكت منهم بالحروب..أنها أرض مباركة وعليها عاش رسولهم ومات وأنها آتية لما حالة.. مبعد عديت شوية أوراق بش نحب نقرب للمخطوطة ونفهمها فتوقفت في فقرة تحكي على حاجة إسمها الكتاب الأسود وأنو هذا الكتاب وجد كمخطوطة كتبها كبار أحبار اليهود وفيها مخطط محكم يجعل من اليهود أسياد العالم مثل ما كانو في وقت ما.. وأنو هذا المخطط يبدأ بإنشاء دولة ممتدة الأطراف تكون على أرض الميعاد نفسها تبنى وتربى عليها الأجيال الجديدة وأهم شئ أن تهتم هذه الدولة بتعليم أبنائها و تركز نفسها إقتصاديا وسياسيا وإجتماعيا وأن تهتم قبل كل هذه المجالات بتركيز أبنائها ثقافيا ودينيا ثم تنشر ثقافة تختلقها وتجعلها ثقافة العالم تغزو بها عقول الناس وتبتعد عن الحروب الدموية وتجعل المستعمر لا يشعر بأنه مستعمر..يفكر ويعيش كما يخططون له وكل ما يفعله يكون متوقعا عندهم حتى يصل إلى مرحلة يحارب فيها أهله ودينه ومجتمعه معتقدا أنه متطور وحر. وأتذكر جيدا جملة لن أنساه أبدا يقول الكتاب أنها مقتطفة من الكتاب الأسود الذي تعددت نسخه إلا أن النسخة الأصلية لا يعرف أحد مكانها والأكيد أنها موجودة ولكنها محفوظة بعناية وتورّث من جيل لأخر والجملة تقول "ذلك النصر العظيم عندما تجعل الناس يعتقدون أنهم يفكرون، ينتابهم ذلك الشعور بالعبقرية فيخاطبونك بلغة تقلل من عقلك، يفكرون لكنهم لا يعلمون أنك صاحب العقول." ذكر الغزو الثقافي بكثرة في الكتاب وكان يتحدث وكأنه يصف ما نحن عليه اليوم..العولمة. 

  بعدها بدا يحكي على ما يسمى مخطط الثعبان وسمي بمخطط الثعبان خاطر شكل الزحف عل الخريطة كان يشبه الثعبان وكيما قلنا مالأول بدا من نقطة بداية إلي هي أرض الميعاد (فلسطين) ثم يزحف إلى لبنان فالعراق فسوريا إيرن تركيا مصر(ومصر هنا يقصد بها مصر والسودان منسيتش إلي الكتاب تكتب في الأربعينات) ليبيا لينتهي إلى بلاد المغرب حيث رسموا فم الثعبان مفتوحا وترى في المخطط أن بلاد الخليج تأتي في الوسط محاطة بجسم الثعبان من كل ناحية.

الحقيقة ما كملتش قريت الكتاب وقتها قلقت وما كنتش نهتم بالمواضيع هذي لكن اليوم إكتشفت أنو أهم كتاب قريتو في حياتي رغم أني قريت منو كان صفحات تعد على الأصابع وندمت أني مقريتوش الكل وماستفدتش منو..طبعا تحمصت خاطرو ضاع ودايور قبل ما يضيع وراقو شطرها مشات..الكتاب هذا مهم خاطرو تكتب قبل قيام الدولة الإسرائيلية وقبل ما يكون العالم على ماهو عليه اليوم لأنو لربما بعضكم يعرف حاجات خفيفة على هالموضوع لكن نذكر أنو الكتاب تصدر في بداية الأربعينات وبرا شوف عاد وقتاش تكتب.

المهم..أنا كتبت المقال موش بش نشكر الكتاب ونبين أهميتو بركة وإنما حبيتو يكون إطار بش نحذر الناس ملي قاعد يصير في سوريا بعد التجربة العراقية ..طبعا الناس تحكي ع الثورات والحرية والإنسانية ومساندة الشعب السوري ومعا ضد إكس كيما صار بالضبط مع ليبيا .. الناس كانت تحكي على ثورة ليبية وندرا شنوة ثم أكتشفت أنو إلي صار هو مجموعة من المجازر وتصفية حسابات وبيعة وشرية في النفط.

اليوم نقول كيما قال الكتاب هؤلاء ما عادش يستعمرونا بالحرب ونصب الحماية ولاو يخليونا ناكلو رواحنا برواحونا..يختلقون حروبا في عقولنا فنصبح أعداء بعضنا البعض يحاولون الدخول إلى أراضينا بتعلة السلام وجايبينها حزازة ومبعد يدور علينا يسرقون أرضينا ورزقنا ويمحيو ثقافتنا وهويتنا وزيد يتحكمو فينا..اليوم سوريا كان طاحت بغض النظر عم يحصل حقيقة فيها حضرو رواحكم لأن دوركم قد إقترب.

                                                                              ميرامار_Miramar

    

أصدر هذا حقا عن النبي؟ :o

في وحدة من الصفحات المحسوبة على الملحدين التوانسة لفت نظري بيبليكاسيون متاع حديث مروي عن النبي صلى الله عليه وسلم و نصه : قال النبي صلى الله عليه وسلم" لما أسري بي إلي السماء: فصرت إلي السماء الرابعة سقط في حجري تفاحة, فأخذتها بيدي, فانفلقت, فخرج منها حوراء تقهقه فقلت لها: تكلمي, لمن أنت ؟ قالت: للمقتول شهيدا عثمان."

و تحت الحديث كتب أدمين الصفحة فيم معناه " كيفاش قوم عندهم عقل يصدقون من يقول لهم أنه طار في السماء والرابعة زادة و تفاحة تفلقت وخرجت منها مرأة تتكلم و قالت أنا لعثمان , ذكرني هذا بكوميكات ديزني و قصص علاء الدين, كيفاه الناس ما تصدقش إنو محمد هذا ينجم يكون متوهم و صاحب أمراض نفسية كالهلوسة . انتهي كلامه .

قبل ما نبد نحكي في تفاصيل نحب نبين أنو هذا المقال تكتب في شكل ثنائية بين المدونة ميرامار وأحد الدارسين بالأزهر الشريف وهو عبد المجيد بلغيث.

أما بعد, ليعلم الجميع أن سب النبي كفر و أن حكم نقله علي أوجه منها كما قال القاضي عياض المالكي في كتابه الشفا في حقوق المصطفي : أن يقول ذلك حاكيا عن غيره و آثرا له عن سواه فهذا  ينظر في صورة حكايته و قرينة مقاله : فإن كان أخبر به علي وجه الشهادة و التعريف بقائله و الإنكار عليه و التنفير منه و التجريح له فهذا مما ينبغي امتثاله و يحمد فعله . فصل حكم الناقل و الحاكي صفحة 636 من الكتاب المذكور .

يعني إلي ينقل كلام كيما هكا علي النبي فإنه لا يكفر بذلك شريطة أن تكون نيته التعريف بقائل الكلام وتنفير الناس منه والردّ على الشبهة و هذا مقصدنا إن شاء الله .

ثم ندخلو في صلب مقصد هذا المقال.. أدمين هذه الصفحة ما شاء عليه نقل الكلام هذا إلي هو الحديث المزعوم, لربما لقاه صدفة على الإنترنات أو قرأه في أحد الكتب وهذا مستبعد جدااااااااا لأن أمثال هذه المرويات لا توجد إلا بكتب التواريخ التي تحوي ما هب ودب وهذه الرواية بالذات ذكرها الخطيب البغدادي في (تاريخ بغداد) (5/297) ولا أعتقد انو مثل هؤلاء من الناس من النوع إلي يحل كتاب أو حتى لا أظلمهم لا اعتقد أنهم من النوع إلي يطّلع على كتب التراث الإسلامي. و المشكل موش في النقل برك.. الشخص هذا بنى فكرة و إستنتاجات وتقريرات وطاح يحلل ويعطينا في دروس في علم النفس و لم يتوقف هنا بل قام بنشر الرواية متفاعلا مع المتابعين له في صفحته بل كذلك محاولا إقناع الناس بأنهم أغبياء لتصديقهم مثل هذه الأشياء مستهزئا بأمة كاملة.

أولا نبدأ بقول الله تعالى: يا أيها الذين آمنوا إن جاءكم فاسق بنبأ فتبينوا أن تصيبوا قوما بجاهلة فتصبحوا على ما فعلتم نادمين . الحجرات 6.

فبعيدا عن كلام هذا المدون تعالوا لنسمع أقوال أهل العلم الثقات و العدول في نقدهم لهذه الرواية وتعقيبهم عليها.

جاء هذا الحديث المزعوم كما ذكرنا سابقا في تاريخ بغداد للخطيب عن طريق محمد بن سليمان بن هشام حدثنا وكيع عن ابن أبي ذئب عن نافع عن عبد الله بن عمر رضي الله عنه قال قال رسول الله : " لما أسري بي إلي السماء: فصرت إلي السماء الرابعة سقط في حجري تفاحة, فأخذتها بيدي, فانفلقت, فخرج منها حوراء تقهقه فقلت لها: تكلمي, لمن أنت ؟ قالت: للمقتول شهيدا عثمان."

والذي غاب عن فكر صديقنا المدون أن درجة هذا الحديث الوضع, يعني أنه موضوع مكذوب على النبي صلي الله عليه و سلم و علة وضعه الراوي محمد بن سليمان بن هشام الذي أتهمه الخطيب و هو صاحب الكتاب الذي نقلت عنه الرواية بالكذب كما كذبه الذهبي في كتابه (ميزان الإعتدال) وقال فيه بن عدي "يوصل الحديث ثم يسرقه" ولربما بعضكم يتساءل لماذا نسلم برأي الخطيب والذهبي وغيرهم ومن هؤلاء أصلا؟ و الحقيقة أن هؤلاء هم علماء, أهل صنعة ومعرفة فيما يسمى علم مصطلح الحديث و علم مصطلح الحديث هذا هو علم يتناول دراسة الحديث من حيث الراوي والمروي فهو يهتم بنقل الحديث, ضبطه وتحرير ألفاظه ويهتم كذلك بحال الراوي والمروي من حيث قبول الحديث ورده, وهذا ما نحن بصدد مناقشته فهؤلاء العلماء إهتموا بأحوال رواة الأحاديث و مدى صدقهم وضبطهم, ومن خلال ذلك إستطعنا اليوم أن نفرق بين ماهو صحيح عن النبي صلى الله عليه وسلم وما هو كذب وإفتراء عليه وهذا هو حال الرواية المزعومة عن أدمين الصفحة الجاهل.

وبالتالي هذه الرواية هي حديث موضوع والحديث الموضوع هو كل ما نسب إلى النبي من قول وفعل أو تقرير أو صفة وأضيف إليه ولم يتكلم به ولم يصدر عنه وكان راويه وناقله كذابا. وبذلك أصبح الحديث الذي بنى عليه الأخ الأدمين أفكاره وأستشهد به ليستهزء بالنبي ودين الإسلام باطلا وليس له شيء من الصحة ..والحقيقة أن هذا حال العديد من الملحدين والعلمانيين الذين يأتون بأحاديث لا يعلمون صحتها من ضعفها ويستشهدون بها لدعم أقوالهم كحال الأدمين الذي ذكر إعتماد العقل والأساليب العلمية  إلا أنه بذكر هذا الحديث لم يعتمد منهجا علميا يسلم له  بتضعيف أو تصحيح هذا الحديث من حيث نسبته إلى النبي.

رسالة إلى أمي

كاينو البارح برك كنت معاك..ليل كامل ما رقدتش نخمم فيك توحشت صوتك. قمت هزيت التليفون طلبت نومروك و بكيت أمي.. بكيت خاطر نعرفك مكش بش تهز عليا.

 قداش من مرة قنعت روحي إلي إنتي مشيت و إلّي الحكاية وفات .. قداش من مرة قلت للروحي الحياة تستمر و النسيان نعمة.. قداش من مرة جيتني في المنام توشوشلي و ما نفهمكش.. قداش من مرة تكلمني و ما نسمعكش.. تضحكلي و تمشي و أنا نبقى نستنى فيك بش ترجع و إنتي ما ترجعش.

أمي.. توحشت نجري نتخبى وراء ظهرك.. نشم شعرك و مبعد نفرفشهولك.. توحشت قبقابك و سفساريك.. توحشت شقّاقتي وماكينة الخياطة و حوايج العيد. ياخي ما توحشتنيش؟

مازلت فيّا أمي.. تعيش في داخلي..ساعات نسمع صوتك في مخي.. و ساعات نجبد تصاورك بش نبقى ديمة نتفكر وجهك.

 تعرف قداش عمري اليوم؟  إنتي راضية عليا؟ أمي .. تسمع فيا؟

في بالك عمري ما قتلك نحبك؟ ممكن وقتها ماجاش البالي إلي إنتي تنجم تمشي و تخليني.

فهمني أمي.. راني ضعت.. رسيني و قلي شنعمل..قلبي معبّي حزين و الدنيا صعابت..الناس تبدلت.. البلاد تبدلت.. العالم تبدل.. حتى أنا أمي.. حتّى أنا تبدّلت.

قلي شنعمل.. شنوا نجم نعمل بش ترجع.. تعرف كان ترجع الدنيا تزها في وجهي و ما عادش نبكي أمي.. موش إنتي ما تحملش تشوفني نبكي؟.. كان ترجع أمي نعنقك و نبوس كفوف يدك و نبكي عند ساقيك بش تسامحني.. كان ترجع أمي نرجعو كيما قبل.. نتلمو عندك كل نهارة جمعة نفطرو كسكسي و نفدلكو و نعملو جو... كان ترجع أمي ما نحطك فوق ظهري و نجري بيك نخبيك بش ما عادش تسيبني.

أمي.. مصعب فراقك.. راني تعبت.. تعبت من مشاكل الدنيا..تعبت من روتين كل يوم.. تعبت م الخدمة.. تعبت م الأحلام.. تعبت م الناس الدايرة بيا.. وحدك أمي تحس بيا .. وحدك أمي تعرف دوايا.. 

أمي.. هزني.. إيجا هزني بين إيديك و طير بيا بعيد... بعيد.. بعيد.. غادي وين إنتي تكون.. مادمني في حضنك أكيد بش نكون في راحة.

Miramar _ ميرامار 

تونس الغد

الستة متاع الصباح, نوقزت المنقالة, قام دخل للتواليت, غسل وجهو, حك سنيه, مشط شعرو , لبس حوايجو و خرج للمحطة.

كي العادة و في وقتها جات الكار, موش معبية أما الكراسي المرة هذي مليانة.. قص تسكرتو ووقف بحذا الشباك رغم إلي الكار مفوحة و ريحتها تهز الروح..

_صباح الخير.. ( ابتسامة)  

_ صباح الخير.

_ خويا..بربي سامحني إيجا خوذ بلاصتي..

_ بارك الله فيك.. نهارك زين..

_( إبتسامة).

وصل للخدمة في وقتو.. طلع للبيروه.. بداو المواطنين يجيو.. الإبتسامة ما فارقتش وجهو.. الخدمة كثرت أما هذا ما منعوش بش يهز ورقة مواطن من وزارة لوزارة حتى يكملو الملف متاعو.

جاء وقت الفطور..تلمت الناس الكل في البوفيت يتناقشو و يحكيو على موضوع الفاكونس صيف السنة وين بش يكون بما أنو الدولة مخصصة لكل مواطن شهر عطلة على حسابها حتى تكون الحالة النفسية للمواطنيه منظمة و خالية من المشاكل.

وفات "البوز داج" و كل واحد رجع للبيروه حاير وين بش يمشي في عطلتو.. الحقيقة الحكاية هذي بيناتنا تعبت شوية الموظفين خاصة و أنو الدولة ولّاة عندها تقصير كبير من الناحية هذي.

رجع للبيروه السيد وتذكر فجأة موعدو مع مولى الدار, طلبو م التلفون و تفاهمو على سوم البرطمان في أحد ناطحات السحاب بالقصرين..و أعتذرلو بما أنو موش بش ينجم يقابلو.

كمل خدمتو, و قال علاش ما يتعداش للسوق يقضي فرد مرة.. تبارك الله الأسوام مريقلة و في متناول الزوالي.. عبا صاحبنا القفة و عاد للبيت فرحا مسرورا..

أول حاجة عملها تعدا للجارو عطاه شوية قضية و طل عليه.. و كي وصل للدارو لقا ورقة الماء و الضو و التليفون و الزبلة و الخروبة و فاتورة الإنترنات وإستدعاء م البلدية قدام الباب..الحقيقة ماستناش الأخ تعدا للبانكة فيسع جبد فلوس و خلص فاتوراتو و تعدا للبلدية وين إستقبلو الحارس ثم موظفة الإستقبال إلي لحت عليه أنو يطلع للرئيس البلدية إلي ما فماش مواطن يدخل لمحل خدمتو إلا و يقابلو .. أيا طلع .. و استقبلو المسؤول بكل محبة و بكل مودة, طلبلو قهوة و مدلو ورقة مكتوب فيها شهادة المواطن المثالي لعدم إلقائو الفضلات إلا بالحاويات المخصصة..

إستغرب صديقنا لأنو موش الوحيد إلي يلوح الزبلة في مكان الزبلة و إنما الشعب الكل.. ثم فهم أنو جيرانو في المنطقة إختاروه عن طريق صندوق إنتخابي حر و سري. و للمرة الثانية يرجع للبيت فرحا مسرورا.

أيا حضر عشاه و كلم الخطيبة .. عاش لحضات حب هاتفية و السعادة تغمره خاصة و أنو زوجتو المستقبلية لا تتشرط لا تزن على راسو لا تحكي في مواضيع تفدد.. الطفلة كتلة متاع سعادة و عاطفة و حنية و رقة و جمال.

ديزولي..أما بش يعلق عليها و هي زادة بش تعلق خاطر بدا برنامج العيادة التلفزية إلي مافماش مواطن ما يتفرجش عليه بعدها بالضبط جات الأخبار و كي العادة كانت المادة الإعلامية إلي قدموها قوية ياسر و فيها شفافية خارقة حتى ساعات صديقنا يوصل يصفق و الدموع تغمره ككل تونسي من كثر ماهم منصفين و يعطيو لكل ذي حق حقه خاصة بعد خبر أنو تمكنت تونس أنها تكون أول دولة  تنحي وزارة الداخلية و تسلح بوليسيتها بالجرايد لأنو و بكل بساطة لم يعد هناك جريمة..إي نعم تونس كي العادة كانت السباقة في القضاء ع الجريمة لا عاد فما سرقة لا رشوة لا قتل لا تحيل لا حرقة لا تعاطي مخدرات و حتى الزبراطة ولاو يفهمو رواحم .. يتكيف اليوم في ليلتها يقدم روحو. تبقينا الحاجة إلي تخلي الإعلام ناقص اليلة أنو ما جابش سيرة العطلة و لفت نظر الحكومة أنو وقيت بش يمدو فلوس الفانكونس الصيفي السنوي.

بعد الفرجة ع التلفزة قام صديقنا حل الإنترنات.. يلقى الناس ديجا قريب ترقد خاطر يصبحو يخدمو و السهر ينجم يتعبهم.. الحمد الله ملي تم القضاء على أخر بطّال, الفايسبوك ولا ينش في الذبان في الليل..

العشرة متاع الليل, قرر بش يحط فيلم تونسي حتى يجيه النوم.. الفيلم هذا خذا جوايز عالمية كبيرة خاصة وأنو يناقش علاقة المرأة بالحمام و الأدواش في تونس..  و إلي زاد عملو شهرة كتاب المؤلفة "صدفة  يونس" إلي حكات على عدم أهمية الحجاب في المواضيع إلي كيما هذي.

تسمعو في الشخير؟ ما تتقلقوش هذا صديقنا راقد في سابع نومة.. يجبد فيه خماري .. أيا سل روحك بالشوية.. و أضرب إنتي فيلم كيما نعرف أنا ضربة ضربة للنعاس.

تصبحو على خير..  أنا بش ندوخ ..

حقا نسيت بش نقلكم حاجة.... صديقنا إسمو" بكة" مع ضم الباء.

  Miramar _ميرامار 

إنقلاب 14 جانفي 2011 بتونس ( لأول مرة أسماء الضباط المتورطة )

بقيت نخمم برشة لحقيقة قبل ما نبدا نكتب المقال هذا و بصراحة ملات راسي فكرة الخوف من المشاكل الي تنجم تحصلي لا لشئ إلا لذكر أسماء ناس مازلت تخدم اليوم في وزارة الداخلية, كذلك خممت كيفاش زعمة تنجم تكون ردة فعل الناس إلي بش تقرالي خاصة و أني بش نبعد ع التقديس و نحكي عل الأشياء كما هي, فكرت زادا في أنو ما عنديش دليل واضح و بينة صحيحة نستند عليها و إنما إلي بش نكتبو هو مجموعة إستنتاجات توصلتلهم من مدة أما ما كانتش عندي الجرأة نحكيها. تبقينا قررت نكتب اليوم لسبب وحيد بالنسبة ليا كان مهم و هو أنو في حالة الرواية إلي بش نحكيهالكم طلعت صحيحة يكون مقالي هذا شاهد على أسبقيتي في تحليل الوقائع. الحاجة الأكيدة في الموضوع هذا الكل قبل ما نتعدى للي بيه الفايدة , أنو الأسماء إلي بش نحطها هوما شخصيات حقيقية موجودة فعلا في وزارة الداخلية و الدقة في أسمائهم هي إلي بش تأكد صحة كلامي خاطر حتى علي العريض اليوم يمكن ياسر ما يعرفش بعضهم.

كيما تعرفو, لحكاية بدات نهار 17 ديسمبر وقتلي خضار بالبرويطة متاعو حرق روحو قدام البلدية بسيدي بوزيد. محمد البوعزيزي هو خضار جاتو فادية البوليسة بعد عركة فكتلو البسكولة متاعو فملقاش كيفاش يرد عليها قاللها بصريح العبارة فيما معناه "باش بش نوزن؟ ببزازلك؟" و من غير تفكير هزت فادية يدها و عطاتو كف. بالطبيعة البوعزيزي ما سكتش و خلت وراء عونة البلدية بش ترجعلو ميزانو و من كلمة للكلمة مع الغزول عل الكف خرج البوعزيزي قدام البلدية و صب على روحو الأيسونس و هدد بش يحرق روحوكان ما يرجعولوش دبشو.. السيد في غفلة جبد دخانو بش يتكيف و قدحة من بريكيا شعلت الدنيا. تلمت الطامة و العامة من صباح غدوة يحبو يداويو ولدهم المصاب بحروق بليغة و بالطبيعة وصلت الحكاية للمعارضة و بعض صيادي المياه العكرة .. و فيسع فيسع و خلينا نكونو صريحين تم تسييس القضية و ملي كانت قضية واحد حرق روحو يطالب يداوي ولات قضية الحق في التشغيل ورد إعتبار لكل شاب كمل قرايتو في تونس رغم أنو البوعزيزي ماكانتش عندو شهادة جامعية و لا هو بطال. و إنما يخدم على رويحتو و مستواه التعليمي بسيط ما يأهلوش بش يخدم كان خضار و بالتالي جعله رمز لقضية التشغيل يزيد يأكد أنو القضية تسيست من عدة أطراف لقاتها فرصة و مدخل للضغط ع الدولة الممثلة في بن علي. مانجموش ننكرو زادا دور قناة الجزيرة إلي كانت ناقلة للأحداث أما بطريقتها المعروفة من تهويل و حتى كذب و كيما يقول المثل "ما فماش قطوس يصطاد لربي" القناة هذي إلي يهمها في نهاية الأمر هو نسبة المشاهدة مهما يكون الثمن.. حتى على حساب أمن ناس أخرى و فما غريبة أنا عايشتها شخصيا مع قناة الجزيرة وقتها تونس مازلت مخلوذة شوية فنتذكر مرة جابو كالآتي :" عناوين الأنباء: تونس لازلت تنزف.. مبارك يقاتل شعبه.. قصف إسرائيلي على غزة.. لبنان و الإنقسامات.. حروب أهلية بالسودان..تحركات ليبية و القذافي يعتبره شغب... البحرين بين الشيعة و السنة..نعود إليكم بعد هذا الفاصل... الخطوط القطرية ..راحة و أمان..نحن على ذمتكم و في خدمتكم ( تصاحبها موسيقى هادئة)." بصراحة كي شفت الفازة هذي فقت وقتها إلي بالرسمي الجزيرة لا يهمها تونس و لا أولاد تونس و إنما تخدم في مصالحها الخاصةو قلت وقتها فعلا الإعلام لا دين له.

الحقيقة التسارع في الأحداث كان غريب و هذا إلي ركب الشك لبرشة كيفي خاصة و أنو في 72 ساعة تغيرت المطالب من "البطالة كلاتنا يا سيدي الرئيس" إلى "الشعب يريد إسقاط النظام" إلى "بن علي ديقاج" و هذي شعارات بالسرعة هذي مينجمش يكون المنطلق متاحا مواطن عادي.

المهم تطورت الأحداث و الشعب هاج و في وقت معين خرج ع السيطرة و هكا نكونو وصلنا تقريبا ل ليلة 14 جانفي بش نخرجو من صدى الشارع لداخل القصر الرئاسي و هذا هو موضوع المقال.

الأكيد و المؤكد أنو بن علي تكبس و مات بالرعب على بلاصتو و أنا متأكدة أنو كان مستعد يعمل أي حاجة حتى و لو يوصل بيه الأمر أنو يضحي بأنسابو, المهم ما يخسرش بقعتو و كلكم بالطبيعة تتذكرو خطاب أنا فهمتكم غلطوني إلي نعتبرو شخصيا أقوى خطاب حكاه بن علي من 23 سنة و ما نكذبش عليكم كنت م الناس إلي تعاطفو معاه و صدقوه لا لشئ إلا لأن وضعيتو كانت صعيبة و كيما نقولو في لغتنا الزلقة بفلقة و ماكانش من الممكن أنو يخالف أي وعد قالو, لا قرار خذاه وقتها نظرا لضعف موقفو و كيما قلنا م الأول كارييرو كان في خطرو لكن حتى واحد ما يعرف ربي أش مخبيلو. لأخر لحظة نهار 13 جانفي و بن علي على أعصابو و لكنو كان عندو أمل أنو يسلكها بالسياسة ولا بالقوة.

و من غدوة الصباح لم الوزراء و الناس إلي يوثق فيهم على أساس بش يشوف حل للكارثة . تبقينا إلي ماجاش لبالو أنو الغدارة متربصين في كل بلاصة و الخيانة في السياسة موجودة من عهد قبل..

نهار 14 جانفي 2011 كان يوم الإضراب العام في تونس العاصمة و بالطبيعة و كيما الإضرابات إلي سبقت في الولايات الأخرى كانت التقارير توصل للرئيس مفصلة من وزارة الداخلية و من الجهات المسؤولة و بطبيعة بن علي في قصرو و ما ينجم يعرف حتى معلومة كان من خلال سيلول المعلومات المخابراتي.. فجأة ظهر لمجموعة معينة أنها تنجم تتخلص من بن علي, فرصة تقلب عليه الطرح و تصبح من غدوة هي إمّالي البلاد و الفكرة كانت بالتحديد لبودريقة.

أول حاجة إنطلقت "الثورة" من قسم المعلومات بالقصر بالتنسيق مع وزارة الداخلية و بداو يبثو في المعلومات الغالطة و الإشاعات (كالقبض على الطرابلسية و تقدم الشعب على ساقيه للقصر و محاصرة قصر سيدي بو سعيد).... على ضوء المعلومات هذي خذا بن علي قرار أنو بش يسفر عايلتو حتى لين تهدا الأمور.. إختيارو للسعودية ماكانش إعتباطي خاطر الأمير نايف ولي العهد المستقبلي للسعودية يصادف أنو كان ضيف في تونس و هذا إلي صار .. نية بن علي وقتها كانت يبعد عايلتو ع الجو المتوتر خاصة و أنو الشعب فادد من مرتو و أخوتها. المهم طلب الزين من علي السرياطي  الحرس الخاص ليه و صديقو المقرب أنو يحضر طيارة و أنو يحضر زادا علي نفسو بش يرافق ليلى الطرابلسي وولدها و بنتها حليمة و خطيبها للسعودية و أنو هو بش يبقى حتى لين تهدا الدنيا. في نفس الوقت من شيرة أخرى فما ناس لاهية تحلم بالحكم و الرئاسة على راسهم بودريقة و كي شاف العباد هايجة و حد ما لاهي بحد و الصحيح ما يعرفو حد إغتنم فرصتها و بعث ميساجات و إشارات لأعون الأمن الكل و نقصد الضباط الكبار متاع الداخلية أنو بن علي إنتهى و أنهم لازمهم ياخذو بزمام الأمور.

في الوقت إلي الطيارة قاعدة تتحضر جات لبن علي معلومة تقول أنو فما هليكوبتر تتجه للقصر بش تقتلو و إلي كل شي خرج ع السيطرة (و هذا بالطبيعة موش صحيح) و إلي كان ما يهربش الشعب بش يقتلو..و مبعد شوية جاتو ليلى مرتو و قتلو إلي ما فما حتى بوليس في قصر سيدي بو سعيد و إلي حتى الحراس متاع السيوفة في قصر قرطاج مفماش ( جاهم أمر بالأنسحاب من كامل تراب الجمهورية أذيكا علاش ما كان فما حتى بوليس في الشارع عشيتها) . كي سمع الرئيس هالكلام هز التليفون و كلم الداخلية ( بالطبيعة وزير الداخلية ما يعرف شي ولا فاهم حاجة.. القررات و التعليمات ما تطبق كان كي تبدا صادرة م الضباط الكبار إلي حكينا عليهم) وكي كلم الداخلية ما هز عليه حد.

الرئيس بن علي و ما أدراك يطلب وزارة الداخلية من تليفون الرئاسة الخاص و ما يهز عليه حد؟؟؟ فهم وقتها بن علي إلي هو مهدد و إلي سايي... إنتهى.... و في آخر لحضة قرر يمشي. و بما أنو فهم لعبة بولسيتو و أنو توا ماهوش محمي و كان بش يسافر م المطار العادي يا بش يقتلوه و هذا الأكيد ولا بش يشدوه. فإتصل برشيد عمار و طلب حماية عسكرية ثنية مطار العوينة على أساس بش يوّصل عايلتو, و هذاكا إلي صار.

في الأثناء يقرر واحد م الضباط أنو يتخلص من بن علي فعلا و يشد الطرابلسية و هكا تكمل اللعبة. السيد بالطبيعة عرفتوه "سمير الطرهوني" لم جماعتو معلوماتي موش مؤكدة و لكن أعتقد أنهم 15 واحد من خيرة أعوان تونس فرقة مقاومة الإرهاب .. لمهم الطرهوني و قالللهم بصريح العبارة أنهم بش ينقلبو على بن علي و أنو العملية موش ساهلة , يا فيها يموتو كان بقا بن علي .. يا فيها يوليو أبطال و ملاك البلاد و بالطبيعة هذا الكل بالتنسيق مع بودريقة.. و في الأخر ما مشاو معاه كان 8 فقط.. طلبو إدارة تونس 7 على أساس بش يصورو ليلة القبض على بن علي أما إلي يحسب وحدو يفضلو..و إلي قاريه الذيب دارسو السلوقي.. و البقية تعرفوه: بن علي هرب من المطار العسكري و الفرقة خلطت كان ع الطرابلسية أو ما بقي منهم.

أما بالنسبة لمخطط الإنقلاب ففما ضابط م الداخلية هو إلي حرق الفيلم كي كلم محمد الغنوشي و قالو على كل شي.. و قتها تظافرت جهود شوية سياسيين ووزرة و جا أكا البيان متاع خلع بن علي. و رغم ذلك إستمر الضغط م الأمن و عشتو الناس الكل فترة الرعب إلي عملوها و الأشاعات إلي بثوها حتى بشوية بشوية هدات الدنيا و تم السيطرة عليها.

هذي هي "ثورتكم" ثورة بوليسية بدات بصدفة لمحاولة لإنقلاب لإنتقال سلمي.

و هذي لائحة أسماء المتورطين الذين تلقاو تعليماتهم من بودريقة للإطاحة ببن علي و إلي متورطين في حكاية قتل الناس لأنو التعليمات ما تخرج كان منهم.. نظفوا الداخلية لأنو من كان يعبد بن علي فبن علي قد رحل و من كان يعبد النظام فالنظام ثابت لايزول.

        
.عبد الله كعبي
أحمد عياض الورداني. 
رفيق الحاج قاسم.
أسامة رمضاني.
سامي العبيدي ( الناطق باسم ليلى الطرابلسي و الي يهزلها الأخبار هو و عبد الوهاب عبد الله. )
العميد شرف دين زيتون. (حرس وطني و هو الي أعطى بأمر اطلاق النار.) 
جلال بودريقة المدير العام لوحدات التدخل.
العميد احريقة أمن وطني.
العقيد عبد الستار بن صالح.
المقدم العربي المسعودي.
الرائد سمير طرهوني (المسؤول عن القناصة و المرافق الخاص لمدام بن علي.)
المقدم الياس زلاق (أمن الرئيس)
العقيد عدنان حطاب.
العميد العربي الكريمي رئيس قاعة العمليات المركزية و المسؤول عن تبليغ المعلومات.)
عزدين الخلفي مدير الحدود و الأجانب.
الشاذلي ساحلي (مديرالمصالح الفنية بوزارة الداخلية) 
عبد الكريم غومة و علي منصور عقيد أول