تونس الغد

الستة متاع الصباح, نوقزت المنقالة, قام دخل للتواليت, غسل وجهو, حك سنيه, مشط شعرو , لبس حوايجو و خرج للمحطة.

كي العادة و في وقتها جات الكار, موش معبية أما الكراسي المرة هذي مليانة.. قص تسكرتو ووقف بحذا الشباك رغم إلي الكار مفوحة و ريحتها تهز الروح..

_صباح الخير.. ( ابتسامة)  

_ صباح الخير.

_ خويا..بربي سامحني إيجا خوذ بلاصتي..

_ بارك الله فيك.. نهارك زين..

_( إبتسامة).

وصل للخدمة في وقتو.. طلع للبيروه.. بداو المواطنين يجيو.. الإبتسامة ما فارقتش وجهو.. الخدمة كثرت أما هذا ما منعوش بش يهز ورقة مواطن من وزارة لوزارة حتى يكملو الملف متاعو.

جاء وقت الفطور..تلمت الناس الكل في البوفيت يتناقشو و يحكيو على موضوع الفاكونس صيف السنة وين بش يكون بما أنو الدولة مخصصة لكل مواطن شهر عطلة على حسابها حتى تكون الحالة النفسية للمواطنيه منظمة و خالية من المشاكل.

وفات "البوز داج" و كل واحد رجع للبيروه حاير وين بش يمشي في عطلتو.. الحقيقة الحكاية هذي بيناتنا تعبت شوية الموظفين خاصة و أنو الدولة ولّاة عندها تقصير كبير من الناحية هذي.

رجع للبيروه السيد وتذكر فجأة موعدو مع مولى الدار, طلبو م التلفون و تفاهمو على سوم البرطمان في أحد ناطحات السحاب بالقصرين..و أعتذرلو بما أنو موش بش ينجم يقابلو.

كمل خدمتو, و قال علاش ما يتعداش للسوق يقضي فرد مرة.. تبارك الله الأسوام مريقلة و في متناول الزوالي.. عبا صاحبنا القفة و عاد للبيت فرحا مسرورا..

أول حاجة عملها تعدا للجارو عطاه شوية قضية و طل عليه.. و كي وصل للدارو لقا ورقة الماء و الضو و التليفون و الزبلة و الخروبة و فاتورة الإنترنات وإستدعاء م البلدية قدام الباب..الحقيقة ماستناش الأخ تعدا للبانكة فيسع جبد فلوس و خلص فاتوراتو و تعدا للبلدية وين إستقبلو الحارس ثم موظفة الإستقبال إلي لحت عليه أنو يطلع للرئيس البلدية إلي ما فماش مواطن يدخل لمحل خدمتو إلا و يقابلو .. أيا طلع .. و استقبلو المسؤول بكل محبة و بكل مودة, طلبلو قهوة و مدلو ورقة مكتوب فيها شهادة المواطن المثالي لعدم إلقائو الفضلات إلا بالحاويات المخصصة..

إستغرب صديقنا لأنو موش الوحيد إلي يلوح الزبلة في مكان الزبلة و إنما الشعب الكل.. ثم فهم أنو جيرانو في المنطقة إختاروه عن طريق صندوق إنتخابي حر و سري. و للمرة الثانية يرجع للبيت فرحا مسرورا.

أيا حضر عشاه و كلم الخطيبة .. عاش لحضات حب هاتفية و السعادة تغمره خاصة و أنو زوجتو المستقبلية لا تتشرط لا تزن على راسو لا تحكي في مواضيع تفدد.. الطفلة كتلة متاع سعادة و عاطفة و حنية و رقة و جمال.

ديزولي..أما بش يعلق عليها و هي زادة بش تعلق خاطر بدا برنامج العيادة التلفزية إلي مافماش مواطن ما يتفرجش عليه بعدها بالضبط جات الأخبار و كي العادة كانت المادة الإعلامية إلي قدموها قوية ياسر و فيها شفافية خارقة حتى ساعات صديقنا يوصل يصفق و الدموع تغمره ككل تونسي من كثر ماهم منصفين و يعطيو لكل ذي حق حقه خاصة بعد خبر أنو تمكنت تونس أنها تكون أول دولة  تنحي وزارة الداخلية و تسلح بوليسيتها بالجرايد لأنو و بكل بساطة لم يعد هناك جريمة..إي نعم تونس كي العادة كانت السباقة في القضاء ع الجريمة لا عاد فما سرقة لا رشوة لا قتل لا تحيل لا حرقة لا تعاطي مخدرات و حتى الزبراطة ولاو يفهمو رواحم .. يتكيف اليوم في ليلتها يقدم روحو. تبقينا الحاجة إلي تخلي الإعلام ناقص اليلة أنو ما جابش سيرة العطلة و لفت نظر الحكومة أنو وقيت بش يمدو فلوس الفانكونس الصيفي السنوي.

بعد الفرجة ع التلفزة قام صديقنا حل الإنترنات.. يلقى الناس ديجا قريب ترقد خاطر يصبحو يخدمو و السهر ينجم يتعبهم.. الحمد الله ملي تم القضاء على أخر بطّال, الفايسبوك ولا ينش في الذبان في الليل..

العشرة متاع الليل, قرر بش يحط فيلم تونسي حتى يجيه النوم.. الفيلم هذا خذا جوايز عالمية كبيرة خاصة وأنو يناقش علاقة المرأة بالحمام و الأدواش في تونس..  و إلي زاد عملو شهرة كتاب المؤلفة "صدفة  يونس" إلي حكات على عدم أهمية الحجاب في المواضيع إلي كيما هذي.

تسمعو في الشخير؟ ما تتقلقوش هذا صديقنا راقد في سابع نومة.. يجبد فيه خماري .. أيا سل روحك بالشوية.. و أضرب إنتي فيلم كيما نعرف أنا ضربة ضربة للنعاس.

تصبحو على خير..  أنا بش ندوخ ..

حقا نسيت بش نقلكم حاجة.... صديقنا إسمو" بكة" مع ضم الباء.

  Miramar _ميرامار 

إنقلاب 14 جانفي 2011 بتونس ( لأول مرة أسماء الضباط المتورطة )

بقيت نخمم برشة لحقيقة قبل ما نبدا نكتب المقال هذا و بصراحة ملات راسي فكرة الخوف من المشاكل الي تنجم تحصلي لا لشئ إلا لذكر أسماء ناس مازلت تخدم اليوم في وزارة الداخلية, كذلك خممت كيفاش زعمة تنجم تكون ردة فعل الناس إلي بش تقرالي خاصة و أني بش نبعد ع التقديس و نحكي عل الأشياء كما هي, فكرت زادا في أنو ما عنديش دليل واضح و بينة صحيحة نستند عليها و إنما إلي بش نكتبو هو مجموعة إستنتاجات توصلتلهم من مدة أما ما كانتش عندي الجرأة نحكيها. تبقينا قررت نكتب اليوم لسبب وحيد بالنسبة ليا كان مهم و هو أنو في حالة الرواية إلي بش نحكيهالكم طلعت صحيحة يكون مقالي هذا شاهد على أسبقيتي في تحليل الوقائع. الحاجة الأكيدة في الموضوع هذا الكل قبل ما نتعدى للي بيه الفايدة , أنو الأسماء إلي بش نحطها هوما شخصيات حقيقية موجودة فعلا في وزارة الداخلية و الدقة في أسمائهم هي إلي بش تأكد صحة كلامي خاطر حتى علي العريض اليوم يمكن ياسر ما يعرفش بعضهم.

كيما تعرفو, لحكاية بدات نهار 17 ديسمبر وقتلي خضار بالبرويطة متاعو حرق روحو قدام البلدية بسيدي بوزيد. محمد البوعزيزي هو خضار جاتو فادية البوليسة بعد عركة فكتلو البسكولة متاعو فملقاش كيفاش يرد عليها قاللها بصريح العبارة فيما معناه "باش بش نوزن؟ ببزازلك؟" و من غير تفكير هزت فادية يدها و عطاتو كف. بالطبيعة البوعزيزي ما سكتش و خلت وراء عونة البلدية بش ترجعلو ميزانو و من كلمة للكلمة مع الغزول عل الكف خرج البوعزيزي قدام البلدية و صب على روحو الأيسونس و هدد بش يحرق روحوكان ما يرجعولوش دبشو.. السيد في غفلة جبد دخانو بش يتكيف و قدحة من بريكيا شعلت الدنيا. تلمت الطامة و العامة من صباح غدوة يحبو يداويو ولدهم المصاب بحروق بليغة و بالطبيعة وصلت الحكاية للمعارضة و بعض صيادي المياه العكرة .. و فيسع فيسع و خلينا نكونو صريحين تم تسييس القضية و ملي كانت قضية واحد حرق روحو يطالب يداوي ولات قضية الحق في التشغيل ورد إعتبار لكل شاب كمل قرايتو في تونس رغم أنو البوعزيزي ماكانتش عندو شهادة جامعية و لا هو بطال. و إنما يخدم على رويحتو و مستواه التعليمي بسيط ما يأهلوش بش يخدم كان خضار و بالتالي جعله رمز لقضية التشغيل يزيد يأكد أنو القضية تسيست من عدة أطراف لقاتها فرصة و مدخل للضغط ع الدولة الممثلة في بن علي. مانجموش ننكرو زادا دور قناة الجزيرة إلي كانت ناقلة للأحداث أما بطريقتها المعروفة من تهويل و حتى كذب و كيما يقول المثل "ما فماش قطوس يصطاد لربي" القناة هذي إلي يهمها في نهاية الأمر هو نسبة المشاهدة مهما يكون الثمن.. حتى على حساب أمن ناس أخرى و فما غريبة أنا عايشتها شخصيا مع قناة الجزيرة وقتها تونس مازلت مخلوذة شوية فنتذكر مرة جابو كالآتي :" عناوين الأنباء: تونس لازلت تنزف.. مبارك يقاتل شعبه.. قصف إسرائيلي على غزة.. لبنان و الإنقسامات.. حروب أهلية بالسودان..تحركات ليبية و القذافي يعتبره شغب... البحرين بين الشيعة و السنة..نعود إليكم بعد هذا الفاصل... الخطوط القطرية ..راحة و أمان..نحن على ذمتكم و في خدمتكم ( تصاحبها موسيقى هادئة)." بصراحة كي شفت الفازة هذي فقت وقتها إلي بالرسمي الجزيرة لا يهمها تونس و لا أولاد تونس و إنما تخدم في مصالحها الخاصةو قلت وقتها فعلا الإعلام لا دين له.

الحقيقة التسارع في الأحداث كان غريب و هذا إلي ركب الشك لبرشة كيفي خاصة و أنو في 72 ساعة تغيرت المطالب من "البطالة كلاتنا يا سيدي الرئيس" إلى "الشعب يريد إسقاط النظام" إلى "بن علي ديقاج" و هذي شعارات بالسرعة هذي مينجمش يكون المنطلق متاحا مواطن عادي.

المهم تطورت الأحداث و الشعب هاج و في وقت معين خرج ع السيطرة و هكا نكونو وصلنا تقريبا ل ليلة 14 جانفي بش نخرجو من صدى الشارع لداخل القصر الرئاسي و هذا هو موضوع المقال.

الأكيد و المؤكد أنو بن علي تكبس و مات بالرعب على بلاصتو و أنا متأكدة أنو كان مستعد يعمل أي حاجة حتى و لو يوصل بيه الأمر أنو يضحي بأنسابو, المهم ما يخسرش بقعتو و كلكم بالطبيعة تتذكرو خطاب أنا فهمتكم غلطوني إلي نعتبرو شخصيا أقوى خطاب حكاه بن علي من 23 سنة و ما نكذبش عليكم كنت م الناس إلي تعاطفو معاه و صدقوه لا لشئ إلا لأن وضعيتو كانت صعيبة و كيما نقولو في لغتنا الزلقة بفلقة و ماكانش من الممكن أنو يخالف أي وعد قالو, لا قرار خذاه وقتها نظرا لضعف موقفو و كيما قلنا م الأول كارييرو كان في خطرو لكن حتى واحد ما يعرف ربي أش مخبيلو. لأخر لحظة نهار 13 جانفي و بن علي على أعصابو و لكنو كان عندو أمل أنو يسلكها بالسياسة ولا بالقوة.

و من غدوة الصباح لم الوزراء و الناس إلي يوثق فيهم على أساس بش يشوف حل للكارثة . تبقينا إلي ماجاش لبالو أنو الغدارة متربصين في كل بلاصة و الخيانة في السياسة موجودة من عهد قبل..

نهار 14 جانفي 2011 كان يوم الإضراب العام في تونس العاصمة و بالطبيعة و كيما الإضرابات إلي سبقت في الولايات الأخرى كانت التقارير توصل للرئيس مفصلة من وزارة الداخلية و من الجهات المسؤولة و بطبيعة بن علي في قصرو و ما ينجم يعرف حتى معلومة كان من خلال سيلول المعلومات المخابراتي.. فجأة ظهر لمجموعة معينة أنها تنجم تتخلص من بن علي, فرصة تقلب عليه الطرح و تصبح من غدوة هي إمّالي البلاد و الفكرة كانت بالتحديد لبودريقة.

أول حاجة إنطلقت "الثورة" من قسم المعلومات بالقصر بالتنسيق مع وزارة الداخلية و بداو يبثو في المعلومات الغالطة و الإشاعات (كالقبض على الطرابلسية و تقدم الشعب على ساقيه للقصر و محاصرة قصر سيدي بو سعيد).... على ضوء المعلومات هذي خذا بن علي قرار أنو بش يسفر عايلتو حتى لين تهدا الأمور.. إختيارو للسعودية ماكانش إعتباطي خاطر الأمير نايف ولي العهد المستقبلي للسعودية يصادف أنو كان ضيف في تونس و هذا إلي صار .. نية بن علي وقتها كانت يبعد عايلتو ع الجو المتوتر خاصة و أنو الشعب فادد من مرتو و أخوتها. المهم طلب الزين من علي السرياطي  الحرس الخاص ليه و صديقو المقرب أنو يحضر طيارة و أنو يحضر زادا علي نفسو بش يرافق ليلى الطرابلسي وولدها و بنتها حليمة و خطيبها للسعودية و أنو هو بش يبقى حتى لين تهدا الدنيا. في نفس الوقت من شيرة أخرى فما ناس لاهية تحلم بالحكم و الرئاسة على راسهم بودريقة و كي شاف العباد هايجة و حد ما لاهي بحد و الصحيح ما يعرفو حد إغتنم فرصتها و بعث ميساجات و إشارات لأعون الأمن الكل و نقصد الضباط الكبار متاع الداخلية أنو بن علي إنتهى و أنهم لازمهم ياخذو بزمام الأمور.

في الوقت إلي الطيارة قاعدة تتحضر جات لبن علي معلومة تقول أنو فما هليكوبتر تتجه للقصر بش تقتلو و إلي كل شي خرج ع السيطرة (و هذا بالطبيعة موش صحيح) و إلي كان ما يهربش الشعب بش يقتلو..و مبعد شوية جاتو ليلى مرتو و قتلو إلي ما فما حتى بوليس في قصر سيدي بو سعيد و إلي حتى الحراس متاع السيوفة في قصر قرطاج مفماش ( جاهم أمر بالأنسحاب من كامل تراب الجمهورية أذيكا علاش ما كان فما حتى بوليس في الشارع عشيتها) . كي سمع الرئيس هالكلام هز التليفون و كلم الداخلية ( بالطبيعة وزير الداخلية ما يعرف شي ولا فاهم حاجة.. القررات و التعليمات ما تطبق كان كي تبدا صادرة م الضباط الكبار إلي حكينا عليهم) وكي كلم الداخلية ما هز عليه حد.

الرئيس بن علي و ما أدراك يطلب وزارة الداخلية من تليفون الرئاسة الخاص و ما يهز عليه حد؟؟؟ فهم وقتها بن علي إلي هو مهدد و إلي سايي... إنتهى.... و في آخر لحضة قرر يمشي. و بما أنو فهم لعبة بولسيتو و أنو توا ماهوش محمي و كان بش يسافر م المطار العادي يا بش يقتلوه و هذا الأكيد ولا بش يشدوه. فإتصل برشيد عمار و طلب حماية عسكرية ثنية مطار العوينة على أساس بش يوّصل عايلتو, و هذاكا إلي صار.

في الأثناء يقرر واحد م الضباط أنو يتخلص من بن علي فعلا و يشد الطرابلسية و هكا تكمل اللعبة. السيد بالطبيعة عرفتوه "سمير الطرهوني" لم جماعتو معلوماتي موش مؤكدة و لكن أعتقد أنهم 15 واحد من خيرة أعوان تونس فرقة مقاومة الإرهاب .. لمهم الطرهوني و قالللهم بصريح العبارة أنهم بش ينقلبو على بن علي و أنو العملية موش ساهلة , يا فيها يموتو كان بقا بن علي .. يا فيها يوليو أبطال و ملاك البلاد و بالطبيعة هذا الكل بالتنسيق مع بودريقة.. و في الأخر ما مشاو معاه كان 8 فقط.. طلبو إدارة تونس 7 على أساس بش يصورو ليلة القبض على بن علي أما إلي يحسب وحدو يفضلو..و إلي قاريه الذيب دارسو السلوقي.. و البقية تعرفوه: بن علي هرب من المطار العسكري و الفرقة خلطت كان ع الطرابلسية أو ما بقي منهم.

أما بالنسبة لمخطط الإنقلاب ففما ضابط م الداخلية هو إلي حرق الفيلم كي كلم محمد الغنوشي و قالو على كل شي.. و قتها تظافرت جهود شوية سياسيين ووزرة و جا أكا البيان متاع خلع بن علي. و رغم ذلك إستمر الضغط م الأمن و عشتو الناس الكل فترة الرعب إلي عملوها و الأشاعات إلي بثوها حتى بشوية بشوية هدات الدنيا و تم السيطرة عليها.

هذي هي "ثورتكم" ثورة بوليسية بدات بصدفة لمحاولة لإنقلاب لإنتقال سلمي.

و هذي لائحة أسماء المتورطين الذين تلقاو تعليماتهم من بودريقة للإطاحة ببن علي و إلي متورطين في حكاية قتل الناس لأنو التعليمات ما تخرج كان منهم.. نظفوا الداخلية لأنو من كان يعبد بن علي فبن علي قد رحل و من كان يعبد النظام فالنظام ثابت لايزول.

        
.عبد الله كعبي
أحمد عياض الورداني. 
رفيق الحاج قاسم.
أسامة رمضاني.
سامي العبيدي ( الناطق باسم ليلى الطرابلسي و الي يهزلها الأخبار هو و عبد الوهاب عبد الله. )
العميد شرف دين زيتون. (حرس وطني و هو الي أعطى بأمر اطلاق النار.) 
جلال بودريقة المدير العام لوحدات التدخل.
العميد احريقة أمن وطني.
العقيد عبد الستار بن صالح.
المقدم العربي المسعودي.
الرائد سمير طرهوني (المسؤول عن القناصة و المرافق الخاص لمدام بن علي.)
المقدم الياس زلاق (أمن الرئيس)
العقيد عدنان حطاب.
العميد العربي الكريمي رئيس قاعة العمليات المركزية و المسؤول عن تبليغ المعلومات.)
عزدين الخلفي مدير الحدود و الأجانب.
الشاذلي ساحلي (مديرالمصالح الفنية بوزارة الداخلية) 
عبد الكريم غومة و علي منصور عقيد أول

حليلي حب ما بعد الثورة

_ آلو.. مازلت فايقة؟ تسمع فيا؟...شنوة؟!! تي علّي صوتك مانيش نسمع فيك..

_ قتلك توحشتك.

_ إي شبيك توشوش.. حتى أنا توحشتك.. الله غالب الكونكسيون قصت. هاني خرجت شريت دخان و شرجيت لايت.. عملت اكا أبسيون "أحكي للصباح". إسمع....شلابسة؟

_ تي يزي م البلادة.. ممم لابسة نقاب روز.

_ هعهعهعهع ..أيا تجي نعملو قيام الليل مبعضنا مالا؟ ههههه ..إسمع أنا غدوة بش نهبط للأفينو بش نتظاهر مع الشعب البطال.. مشيش يغرو بيك جماعة الفاك و تهبط معاهم؟ نشوفك غادي ما نكسرلك راسك.. فهمت؟

_ حاضر...دايور أنا غدوة بعد القراية بش نمشي مع ماما لإجتماع الجمعية متاحا.. شدت فيا الصحيح و نروحو مخر شوية..دوب ما نبدا في الدار تو نكلمك.

_ توا تقلي!! ما نغير ما نستناك تروح تو نطلبك أنا في الليل..خاطر أنا بيدي بعد المانيف خارج نسهر مع الأولاد مبرمجين قعدة متاع موبيقات. و كيما وصيتك الهملة لا!!! إسمع الشارج طاح.. تو نكلمك الصباح. هات بوسة..

_ أنا بيدي نحل في عينيا بالسيف .. بون نوي حبيبي.. مموااه.

_ مموواه.

                                  ************************

_ شنوا بطيت عليك؟ كنت مع المدام في التليفون .. هاي رقدت.. أيا حل الكام.

_ مان تفاهمنا.. الكام لا.. التليفونات لا.. كتيبة و أكهو.. دايور إنتي مصوحب و علاقتنا فيرتويل ..خليها هكا خير.

_ تعبت م الكتيبة .. و مناش خايفة؟ هاك غدوة بش تشوفني ولا بطلت؟ راني نظفت الدار و بش نعملك عشاء و فن و غناء و جونا حفالي للصباح.

_إي.. نعرف.. أنا بيدي دوشت و حضرت روبا بش نلبسها و نستنى بش نشوفك أما خلي كل شي يجي بطبيعتو.. أصبر على رزقك.

_ تقول إنتي المليح يبطى؟ ..نستنى للّة.. إدلل. سينون الباج متاعك عالمية.. ياخي كيفاش عملت بش خذيت رخصة لمظاهرة غدوة؟

_ هههه رخصة شنوة يا ولدي.. بعلي لحكاية..أعملت إيفينمون عل الفايسبوك .. رقدت و قمت نلقى الشعب الكلو يحب يشارك. صارا هذا إلي يعجبك؟ الباج متاعي برك؟

_ فيك حاجات طيارة برشة..دخّلت في مخي تران.. أنا آبار صاحبتي ما نفركحش برشة.. و صعيب طفلة نوحل معاها.. أما إنتي حاجة أخرى.. مخك و طريقة تفكيرك.. حداثية و ثورية و صاحبة رأي و عندك ديمة ما تقول . أنا نحب المرأة الذكية و المتحررة.. نحب المرأة الفايقة و المفلفلة.. نعشق المرأة الي تصدم و تفهم في الكورة و السياسة على شرط تحب المكشخة ههههه..

_  :) أنا لازمني نرقد.. بوسات في كل مكان في كل مكان..

_ الكلمة الأخرة بش تبيتني نحلم ههههههه.. أيا نخليك أنا بيدي تعبت م الكتيبة و لازمني نفيقلك في فورمة غدوة.. سايس روحك.. قبلاتي .

                                 ******************************

_ إنتي؟

_ إنتي؟

_ تبرك الله عليك يا بنت الفاميليا.. بوك فيبالو بيك خارجة؟ و ماما متاع الجمعية فيبالها ببنتها هاملة ..تشّكل في الرجال م الأنترنات و تمشيلهم للديار؟ و أنا ..أنا طلعت موش راجل.. نتبع في وحدة عاملتلي قرون و بعبوص.. أنتي؟ إنتي مولات الباج أذيكا؟ تصبح للصباح و تكذب تقلي راني بش نرقد؟ أحكي حل جلغتك.. إنتي إلي تحكي بكا اللغة أذيكا مع الرجال؟ إنتي إلي مدخلة روحك في معامع .. آش تفهم منو إنتي؟ يا..يا..يا.. زايد ما تحشمش ..تفييييه.

_ أ..أ..أ.. ستنى... ما تمشيش.. البارح كنت تقلي إلي مخي يعجبك .. تفكيري يعجبك... البارح في التليفون قتلي نحبك .. قتلي توحشتك.. أنا هي نفس البنية .. أنا هوما الإثنين.. و إنتي طلعت نفس الراجل.. كنت محتارة شكون نختار.. أما كي طلعت أنتي هو هو و أنا هي هي المفروض نفرحو.. سامحني.. سامحني كان ما كنتش تعرف.. أما و الله إنتي بركة إلي كنت نحكي معاه بريفي و إنتي إلي حاجتي بيه..

_ ههههههه.. حلوة النكتة.. كلمة ما عادش تزيدها..أنا كنت مخمم ناخذك.. أما سامحني ما ناخذش وحدة كيفك. إنتي وحدة ما تصلحش تربي صغاري.. برى روح.. شوف بهلول آخر تعديها عليه و توا سامحني عندي ما نعمل...

Bienvenue sur Facebook

fbzzz@yahoo.fr

***********

vous avez changer votre situation amoureuse: Votre ami est célibataire.

   ----------------------------------------------------------------------------------------------------

                  ميرامار_ Miramar

نوفل الورتاني الجمهور يحب يسألك: لباس؟

كيما أغلبية التوانسة و خاصة منهم الشباب إلي يتبع الأكتيواليتي, كل نهير سبت التسعة و ربع متاع الليل نتمسمر قدام التلفزة بش نتفرج في برنامج لباس متاع نوفل الورتاني.

البرنامج هذا حتى واحد ما ينكر مدى نجاحو في نسختو الأمريكية و لا حتى التونسية و أنا وحدة م الناس نتبع فيه و نتفرج عليه.  تبقينا المرة هذي صارت مهزلة و بصراحة ما نجمتش ما نعلقش عليها.

كيما تتذكرو , كان أول ضيف لسي نوفل هو الشاب إلي عامل ماسك و يتكلم بإسم عصابة الأنونيموس التوانسة. الشاب هذا طاح يحكي عل الحرية و أنو هو و أصدقائو الأنونيموسات يحميو في الحرية و إلى كل من يتصدالها و أكد أنو فازة قرصنة إيمايل حمادي الجبالي كان رد على ما صدر من الحاكم نهارة 9 أفريل من قمع لحرية التظاهر. كلام حلو و معسول و كلو حساسية و نشاط تبقينا حتى واحد ما قال لهالشاب الصغير إلي فما قاعدة ذهبية إسمها "حريتك تنتهي عند بداية حرية غيرك" يعني بالعربي أنا كي نجي ناخذ حاجة متاعك من غير ما نشاورك و نقسمها مع ناس أخرين قال شنوة هذا درس أو ميساج أو مهما يكون السبب يعتبر قانونا و شرعا سرقة و إعتداء على ملكية ناس أخرى ولا خلينا نقولو إعتداء على حرية الخصوصية للأشخاص و أمانهم العام.

مالا كيفاش ناس كيما هذي ترفع شعار الحرية و تقول أنها تدافع عنو و هي تقوم بجرائم الأعتداء على حريات الغير؟ من ناحية أخرى يبررو عمايلهم في خلاصة وحدة "الغاية تبرر الوسيلة" و هذا بالطبيعة لليعرف تاريخ المقولة هذي ينجم يفهم مدى خطورتها و قداش المعنى متاحا بعيد كل البعد على المبادئ إلي يحكيو عليها هالمجموعة إلي نسمح ننعتهم ب " العصابات الإلكترونية".

على كل حال إلى كلا على قلبي و شرب أنو المفروض مهمة إعلامنا اليوم موش يستدعالنا ناس و يعمللنا تحاليل من غير ما يعطينا الصحيح  "أو ما يجب أن يكون" لا مهمة إعلامنا اليوم ولات أبواق للأغلبية الجاهلة.. كيما خويا نوفل كي جاب السيد و خلاها يحكيلنا ع التمخوير و الشمان إلي يعمل فيه هو و صحابو المفروض كان يفهمو في وسط الحوار و يتوجه للمراهقين و الشباب إلي يتبعو فيه إلي موش هذي الحرية و إلي أنونيموس أو غيرهم ليسو أبطالا و إنما صغار ما لقاوش شكون يوجهم أو يفهمهم معنى الحرية, و أكيكا نكونو حللنا الظاهرة, أعطينا مجال للناس بش تعبر و فهمناهم  كيفاش يخممو و حمينا صغارنا مل الأفكار المغلوطة. و إلا أي واحد غدوة ما يعجبوش كلام واحد أو يحس أنو فما شخص في نظرو ضد الحرية يمشي يبيراتيلو إيمايلات خدمتو ولا فايسبوكو و يقول أنا تابع أنونيموس.

لربما كلامي ماسط بالنسبة للبعض أو موش مفهوم أو ناقص أو غالط جملة و يكون ما يكون, هذا موش بش يمنع الجمهور بش يقول لنوفل الورتاني " نشالله لباس".

ميرامار _ Miramar

انا جاهل! إي نعم انا جاهل!!

الناس الكل اليوم تقسمت على اثنين.  في العايلة, في الشارع, في الخدمة, و الكل لغة وحدة : تونس دولة مدنية و يلزم الفصل بين الدين و الدولة!  لا.. تونس دولة اسلامية و يلزم نعتمدو تطبيق الشريعة!

_ يا ظلامي..                                                                            

_ يا ملحد...

_ انتي متخلف...

_ و انتي يتيم فرنسا..

و كي العادة توفى الحكاية بعركة و حد ماعاد يدور بحد. في الموضوع هذا بالذات تعلمت خاصة مل الفايسبوك بويسك العركات هذي موجودة غديكة بكثرة كل انواع السبان و التبهبير و نعملك ونفعلك.. و سمعت برشة حجج منها الي يضحك و منها إلي يقتل بالضحك. اما الى يومنا هذا ما ريت حتى واحد وسع بالو و فهمنا منين جات حكاية فصل الدين عن الدولة ؟ شنوا إلي يخلينا نعتمدو الشريعة الاسلامية دون غيرها؟ ياخي القوانين الي موجودة ماهيش كافية؟ إلخ..إلخ..

خويا المواطن كي سئلت روحي حسيت بصراحة إلي أنا جاهل.. إي نعم أنا جاهل! فقررت اليوم نقسم معاكم جهلي و شوية معلومات بالك ربي يسهلي و نولي فهيم كيما الشعب الكريم.

الحكاية بدات في القرن 17 تحديدا من اروبا وقتها الفرنسيس والانقليز و السبنيور هوما الي يحكمو في العالم و لحقيقة موش الفرانسيس و السبنيور و الانقليز الكل, الي عندهم العط بركة, نسميوهم احنا البرجوازية معاهم رجال الدين { الي هي المسيحية} بالعربي البباصة , كان الحل و الربط في يدهم. هوما الي يحكمو في البلاد قال شنوة عندهم توكيل من عند ربي و عندهم الحق يشدو البلاد بحق إلاهي {الي يسميوها المثقفين نظام ثيوقراطي: يعني الحكم المتأله كيما فرعون كان تتذكرو}. بالطبيعة الناس هاذم لا يهمهم شعب ولا دين ولا ملة اعطيهم السلطة و سيبهم و بويسك ماهمش ملايكة و غايتهم موش الاصلاح بقدر ماهو لمان الفلوس و الحكم كيفهم كي طبقة البرجوازية حلو في الشعوب متاحم جعفرية بدات مع عدم المساواة بين الكاثوليك و البروتيستون و بين العمال و الغنيين..بين الابيض و الوصيف ..الفقر و العنتزة.. الخصاصة و المشاكل و اشكي لغدوة الصباح و حالة حليلة. ولاتش حرب اهلية ..ولاش فما ناس تخمم في البديل {كيما فلاسفة التنوير}.. قالو علاش منجيبوش واحد منا ..احنا نختاروه .. يشد مديدة و الي بعدو يقوي سعدو و الدين راهو في القلب.. بعّد الكنيسة على الدولة و أمورنا تو تولي ستة زيت.

ايواش عاد قلنا فصل الكنيسة على الدولة و تعممت مبعد وولات فصل الدين على الدولة.. باهي فهمنا!

اما هاذا هاو موش تابعنا احنا.. لا كانت تحكمنا كنيسة ولا نعانيو في الي عناوه الاروبيين في عام الشر..مالا أش لز حمة يغني؟

الحقيقة فما زوز أجوبة يقولوهم إلي يعتبرو رواحم الأقلية العلمانية الديمقراطية, لولا انو التجربة هذي متاع الغرب ميلزمهاش تتعاود معانا, اسلام ولا كنيسة الكلو دين و يلزمنا نتعلمو من تجارب الاخرين خاصة و انها تجربة ناجحة. و الثانية انو عنا قوانين تضبط كل شي فلسن بحاجة إلى مد شرعي.

الحقيقة في الاول قلت واااو كلام جميل و كلام معقول.. مأدرش أقول حاجة عنو..اما بالنسبة لاجابة الاولى فأنا نقول أنو حكم الكنيسة كان ثيوقراطي يعني حكم متأله يقدس فيه الاشخاص اما احنا يا وخياني ديننا يقول السؤال لغير الله مذلة يعني بالعربي لا نقدسو إمام ولا كتب ولا جوامع .. دونك مل المان احنا نختلفو معاهم و بالتالي تغييراتهم ما تعنيناش. أما الاجابة الثانية فالقوانين إلي موجودة حتى وحدة فيهم ما تخالف الشريعة و حتى وحدة فيهم ما جابتها الديمقراطية لان أصلها مستمد من شرع الله الموجود بالعقيدة الاسلامية  بالعربي تم تقنين الاحكام الشرعية و تجريدها من صبغتها الدينية و نعطي مثال: اعتد ديمقرطية يتفزعكو بها برشة هي الديمقراطية الامريكية و مع ذلك ما نبذو العنصرية كان في اواخر السبعينات و دايور مازالو يقاصيو لتوا رغم انو تونس و بقية البلدان الاسلامية ما تفرقش الناس باللون من 1400 سنة وقتها و مع ذلك يقولو علينا الدول المتخلفة.

نحب نسأل في الخاتمة الناس الي تحكي بفصل الدين على الدولة شنوا رايكم في بوش الي هز الكتاب المقدس في خطاب ليه و قال "في هذا الكتاب حل مشاكل أمريكا".

ماعندهاش برشة زادا سمعت نتانياهو رئيس وزراء اسرائيل و التي اعتبرها شخصيا أقوى ديمقراطيات العالم قال "لن نتخلى عن شبر واحد من ارض اسرائيل التوراتية"  أش بيه حتى واحد في العالم ما سمعتو يحكي على فصل الدين على الدولة وينهم وقتها أصحاب الأعصاب المتشنجة إلي ولاو لا دين لا دولة!!

خويا المواطن ساعات نسمعك تحكي على الهوية و دافع عليها بجرودك مبعد تطلب مني نقلد ناس اخرى الي ناس اخرى زادا تقلد فيهم لين نهار بش نوليو كي دجاج المكينة قال الاخر لا تفهم كوعو من بوعو. خويا المواطن إضبط مقعدك في عالم الكوبيي كولي,

Welcome to the 3awlama's World.

          ميرامار _ Miramar